Nachrichten und Veranstaltungstipps / nowosći a pórucenja

Nowosći /Nachrichten - 21.05.2012

Źiśi Witaj-horta w Žylowje maju něnto južo někotare dny swójo nowe lězadło na dwórje. Natwariła jo to firma ze Sakskeje. Planowali su lězadło pak źiśi a wótkubłarki sami. Tak namakaju se w tej drjewjanej konstrukciji serbske motiwy ako mjazy drugim swisle, serbska drastwa, błośańska górka a ptaškowa swajźba. Ako jo pśedsedaŕ spěchowańskego towaristwa Žylojskego horta, Stefan Šurmann, gronił, jo město Chóśebuz lězadło financěrowało.

Hyšći až do stwórtka filmuju w Błotach za nowy kriminalny film. Za to su filmarje telewizijnego sćelaka ZDF filmowali mjazy drugim na Lědach. Zachopjeńk maja su za to insceněrowali jatšowny wogeń. Jo to jadna z nejwažnjejšych scenow w tom filmje. Někak 60 komparsow jo tam sobu gótowało. Wóni su mjazy drugim rejowali Annemarie-polku. Film z titelom „Phoenix” jo pěty kriminalny film z Błotow a pśiźo nejskerjej w nalěśu pśiducego lěta do telewizije.

Nimsko-serbske ludowe źiwadło w Budyšynje jo wupisało za grajnu dobu 2012 a 2013 źěłowe městno za praktikantku abo praktikanta. Nadawki su na pólu źiwadłoweje pedagogiki, marketinga a wobchadanja z pśiglědowarjami. Tak móžo wóna abo wón sobu wugótowaś źiwadłowe projekty za źiśi, wuwiś materialije za inscenacije, redakciski wobźěłaś teksty a wabjeńske akcije źiwadła pódpěrowaś. Zajmce za toś to městno ako praktikantka abo praktikant mógu swóje pódłožki pósłaś na Nimsko-serbske ludowe źiwadło w Budyšynje.

Akademiske sobuźěłaśerje Bramborskeje Techniskeje Uniwersity w Chóśebuzu, wótpokažu plany za fuziju zes Wusokeju šulu Łužyca. We wótwórjonem lisće na wótpołsańcow krajnego sejma groni 600 BTU sobuźěłaśerjow, až zjadnośenje šulowu, by se negatiwnje na uniwersitu wustatkowało. Wóni maju tšach pśed tym, až wědomnostniki wótejdu. Južo něnto jo se źěłowa situacija pogóršyła. Subuźěłaśerje šule su měnjece, až pśi stupajucej licbje studěrujucych a pśiběrajucem wobśěžkanju we wucbje njewóstanjo cas za slěženja. Pśeśiwo planowanej fuziji su zezběrali wót zachopjeńka maja južo 11.000 pódpismow.

Źinsa dej se na Drjejcańskem lětanišću zachopiś testowaś wósebne transportowe lětadło A 400 M. Lětanišćo jo se wubrało za testowanje mjazy wšakimi drugimi městnami w Europje. Wjelebocna mašina, kótaraž móžo teke na krotkich tšawnikach startowaś a teke pśizemiś, jo se wuwiła za pówětšowe wójska europskich NATO – statow, aby wuměniła južo zestarjonu flotu.

Wobšyrne techniske źěła pśi wusćełańskem tormje w Kalawje mógu moliś wusćełanja telewizije a radija. Wót źinsajšnego až do srjody, móžo byś teke rrb program w regionje schylami mólony.