Nachrichten und Veranstaltungstipps / nowosći a pórucenja

Nachrichten/Nowosći: 06.02.2012

Cora jo było w Slěpem lětosne slědne pśedstajenja zapustojskego programa Serbskego ludowego ansambla. Wiźeł jo wóny program pód titelom „Ty sy taka wikotata” dogromady 1.250 woglědarjow na 10 pśedstajenjach. Głowne aktery jadnanja, kótarež grajo w Srjejźnej Łužycy, su byli tenraz mimo spiwarjow, rejowarjow a gercow ansambla Anna-Marja Brettschneiderec, Majka Kowarjec a Gerald Šejn. Tekst napisała jo Jěwa-Marja Čornakec.

Lětosa buźo tomu 185 lět, až jo se twariła Drjejcańska cerkwja w Picańskem amśe. Ale wóna dej se wobšyrnje saněrowaś, dokulaž jo twarjenje bejnje wobškóźone. Pó doněntejšnych planach buźo to wugótowaś něźi 500.000€. Małka wósada pak teliko pjenjez njama. Toś jo se něnto w Drjejcach załožyło spěchowańske towaristwo za saněrowanje wejsnego bóžego doma, kótaregož pśedsedaŕ jo dr. Reinhard Richter. Něnto pyta wósebnje wóne towaristwo dalšnych cłonkow a sponsorow za to twarske prědkweześe. Póžedane su pak teke stare fota cerkwje.

Pśed wušej 100 lětami su słušali Depšćanarje kaž teke kśeśćijany susednych jsow do měsćańskeje ewangelskeje wósady a su stakim měli dosć daloku drogu, gaž su kśěli namšu. Jaden wěsty faraŕ Lani jo se tencas pak za to zasajźił, až dostanu swójski bóžy dom a to w Depsku. Łoni 30. oktobra su w Depsku wóswěśili 100lětne wobstaśe teje ewangelskeje cerkwje.
Akle w tych dnjach pak jo se wunamakał wósebny historiski dokument k tomu a to namšarski pórěd (Gottesdienstordnung) na dnju wóswěśenja cerkwje dnja 18. decembra lěta 1911 dopołdnja zeger źewjeśich (9.00 g.). Na njom su zapisane ako prědne nimske spiwanja a pón serbske, serbske prjatkowanje, zasej nimske spiwanje a nimske prjatkowanje, a za tym zasej serbske spiwanje.

Kóńc tyźenja su we Łužycy zasej we wjele jsach zapustojske pśeśěgi ducy byli. Tak mjazy drugim cora w Drjenoweje ze 26, w Smogorjowje z 20 pórami a južo sobotu w Nowej Niwje ze 17.
Ale teke camprowali zasej su. Tak mjazy drugim něźi 170 camporakow w Żylowje. Tam ga swěśe ten kóńc tyźenja swój 155. zapust. Bramborske serbske radijo buźo tam za Was originalnje pódla.

A něnto hyšći jadna informacija w swójskej nastupnosći:
Móžo se staś, až techniska kwalita našogo źinsajšnego programa až taka dobra była njejo.
To zalažy na tom, až se pśi Kalawskem tormje nowe wusćełańske anteny testuju. Móžo byś, až to se teke hyšći až do stwórtka staś buźo. Pón jo ale móžno, swójo radijo pśestajiś na frekwencu 100,4, źož wusćełamy teke na žwałach MDR naš serbski program.